ROXAS CITY-Nagalaum si Board Member Jonathan Sonny Besa nga ikonsiderar sang city government ang rekomendasyon sang Sangguniang Panlalawigan nga pasugtan nga makabiyahe sang adlaw-adlaw ang tanan nga mga lehitimo nga mga tricycle sa siyudad.
Kasunod ini sang petisyon nga ginpadala sang Capiz Tricycle Drivers, Operators and Commuters Alliance (CTODCA) sa provincial board.
Ginpahayag ni Board Member Jonathan Sonny Besa, Chairman sang Committee on Tranasportation sang SP nga ginarekomendar sini sa city government nga tun-an ang pagpahanugot sa mga tricycle sa siyudad nga makabiyahe sang pito ka beses sa sulod sang isa ka semana nga nagasunod sa gihapon sa pila ka mga health protocols kalakip ang social distancing, pagsuksuk sang facemask kag pagpahamtang sang barrier sa driver kag pasahero.
Apang gin-athag ni Besa nga yara sa gihapon sa diskresyon sang city government ang pagkunsiderar sa nasambit nga rekomendasyon.
Samtang gin-athag man ni Besa nga may yara na sang ayuda nga ginhatag ang city government para sa mga tricycle drivers kag operators nga wala makabaton sang ayuda sa idalom sang Social Amelioration Program ukon (SAP).
Suno ka Besa nga indi mahimo nga mahatagan sang doble nga ayuda ang mga tricycle drivers kag mga operators bangud limitado gid lamang ang pundo sang siyudad.
Ginpasalig naman suno diri sang city government nga tun-an ang mga ginrekomendar sang Sangguniang Panlalawigan.
