ROXAS CITY – Handa nga maghatag sang assistance si Board Member Eleuper ‘’Bulilit’’ Martinez sa mga investors nga luyag maghimo sang legal nga tikang agud mapasabat ang mga uplines kag CEO sang mga kumpaniya nga nagatanyag sang double kag triple your money investment.
Ginpahayag ni BM Eleuper Martinez nga bukas ang law office sini para sa mga investors nga wala ginbalikan sang ila investment.
Suno sa opisyal nga nagatanyag sang libre nga legal assistance ang iya law firm sa mga biktima kag plastaron sang maayo ang ila affidavit agud mangin valid ang complaint nga ila ipasaka.
Nag-apelar man ini sa mga investors nga indi na maglaum pa nga mabalik ang ila investment bangud tuman na ka imposible nga matabo ang ginapromesa sa ila sa diin kasubong nga ginahatagan lamang sila sang false hope.
Kasunod sini nag-apelar man si Martinez sa mga uplines nga kun yara pa sa ila ang kuwarta, ibalik na lamang nila ini sa mga investors, bangud ang iban nagpangutang kag nagprenda sang ila mga propedad sa paglaum nga madoble ang ila nga kuwarta.
Plano man ni BM Martinez nga magfile sang resolution sa masunod nila nga sesyon sa Sangguniang Panlalawigan nga naga-clarify sa Securities and Exchange Commission (SEC) kun ano ang masunod nga tikang nga himoon matapos ang cease and desist order agud mabuligan ang mga investors nga tuman nagsalig sa mga ginpromesa sa ila.
Pabor man ang opisyal nga imbitahon sa sesyon ang mga CEOs sang kontrobersiyal nga mga investment company, apang duda lamang ini kun magatambong sila sa imbitasyon sang provincial board.
