ROXAS CITY – Posible nga nagapamulitika kag nagapasikat lamang si Mambusao Mayor Leodegario Jun Labao Jr., matapos ang nangin pahayag sini sa isa ka post sa social media natuhoy sa pagpapauli kag pagbaton sa mga Locally Stranded Individuals ukon LSI’s sa banwa sang Mambusao, Capiz.
Ini ang ginpahayag ni Board Member Eleuper Martinez sang mainterview sang Bombo Radyo Roxas.
Suno kay Martinez nga wala gid nagapanumdom sang maayo ang nasambit nga alkalde bangud sang damlag lang sila man naghinyo sa Inter-Agency Task Force ukon IATF nga temporaryo isuspinde ang pagpapauli sa mga LSI’s diri sa probinsya.
Ginpahayag pa ni Martines nga “balingag ang utok” ni Labao bangud ginabutang lamang sini sa peligro ang seguridad ukon kaluwasan sang mga Mambusaonon.
Magluwas diri, dugang pa ni Martinez nga halos kulang na ang pasilidad sang amo nga banwa para sa pagbaton sang iban pa nga mga LSI’s.
Gin-athag man ni Martinez nga wala niya gina-personal si Labao bangud mag-abyan man sila apang ginapanumdom lamang sini ang mangin kahimtangan sa ulihi sang iya mga kasimanwa batuk sa Coronavirus Disease ukon COVID-19 kun madayon ang plano sang amo nga alkalde.
Dugang pa sini nga antes gin-anunsiyo sa publiko ni Labao ang iya plano dapat ginkonsulta anay sang amo nga alkalde ang pila ka mga opisyal.
Ginpahayag naman ni Martinez nga ginahimo lamang ini ni Labao bangud posible nga may yara ini sang plano nga magpadalagan sa masunod nga eleksyon sa pagka-gobernador rason nga ginapahumot sini ang iya pangalan.
Nabalaka lamang si Martinez bangud sa posibilidad nga kulangon ang kwarta nga gamiton para sa iban pa nga mga LSI’s nga magapauli sa nasambit nga banwa.
Nagaapelar naman si Martinez sa nasambit nga alkalde nga kun mahimo panumdoman anay sini ang iya mga ginabuy-an nga pahayag antes ipalayag sa publiko.
