ROXAS CITY – “Tapos na akon termino wala nako balak mag-intra sa pulitika pero gina-personal ako ni Vice Gov. Mitang Magbanua”- BM Eliuper Martinez
Ini ang ginbuy-an nga pahayag ni Board Member Eliuper Martinez matapos nga ginkwestyon kag wala ginrelease ni Vice Governor James Mitang Magbanua ang iya nga Representation Allowance (RA) and Transportation Allowance (TA) ukon RATA.
Sa interview sang Bombo Radyo kay Martinez nga ginproseso niya man ang iya mga papeles kag ginpaagi niya naman ini sa mga department heads, accounting kag budget sa kapitolyo probinsyal.
Apang, ginkatingala sini matapos nga ginkwestyon sang bise gobernador kag wala ginrelease ang iya RATA humalin sang bulan sang Agosto tubtob Oktubre sini nga tuig.
Ginpahayag pa ni Martinez nga sang tinalikdan man nga bulan sadtong Abril tubtob Hulyo na-release man sa iya ang RATA apisar nga wala ini sa probinsya.
Nagapati naman si Martinez nga posible ginapersonal ukon ginapangitaan lamang ini sang deperensya sang amo nga bise gobernador.
Dugang pa sini nga naga-contact man ini kay Magbanua apang ginapahayag nga wala siya gina-replyan ukon ginasabat ang iya mga text message kag tawag.
Samtang, ginbawi naman ni Martinez ang gina-request sini nga pondo nga ipasulod kuntani sa opisina sang provincial administrator agud maswelduhan man ang iya mga empleyado.
Suno kay Martinez nga naluoy na ini sa iya mga empleyado matapos tatlo ka bulan na nga wala makabaton sang ila sweldo.
Bangud diri, naghinyo ini sa office of the governor agud nga masolusyonan ang amo nga problema.
Mahibaluan nga naghimo ini sang bag-o nga kontrata apisar nga wala pa sini na-terminate ang daan nga kontrata sang iya mga empleyado.
Samtang, nagalaom naman si Martinez nga kuntani maapruban naman sang Sangguniang Panlalawigan ang gina-request sini nga pondo para sa iya mga empleyado.
Matandaan sang damlag lang gin-interview man si Magbanua kun sa diin ginpahayag sini nga wala niya ginrelease ukon ginpirmahan bangud kinahanglan dapat ang presensya sang amo nga board member.
Ini bangud suno kay Magbanua nga nagalikaw lamang ini sa posibilidad nga siya naman ang balikan sang mga natungdan nga ahensya sang gobyerno bangud sa indi tama nga proseso.
