Makabig nga unfair ang statement kag insulto sa kabug-usan nga miyembro sang Sangguniang Panlalawigan ang ginbuy-an nga pahayag ni CAPENRO head Atty. Emilyn Depon nga gin-akusahan ang chairman sang Committee on Environment and Natural Resources nga gintiplang ang mga kaupdanan sa provincial board rason nga nakalusot ang amendment sa Ordinance No. 11 Series of 2017 ukon quarry operation sa probinsiya.
Ini ang nangin reaksyon ni Board Member Matteo Hachuela sa nangin pahayag ni Atty. Depon nga kasubong ginakwestyon sini ang kapasidad sang mga board members pag-abot sa ila nangin desisyon kag panindugan sa pag-amyenda sa nasambit nga ordinansa.
Ginklaro ni BM Hachuela nga nag-agi ini sa proseso kag indi lamang siya ang nagdesisyon kundi ang mga miyembro sang Committee on Environment kag Committee on Laws and Good Governance.
Wala man nauyunan ni Hachuela ang kasubong paghikay ni Atty. Depon sa kapasidad sang mga board members.
Suno diri nga antes nagpirma sa pag-amyenda sa ordinansa ang kada board member, ginbasa kag ginatun-an nila ini.
Ginpanindugan man sang opisyal nga independent minded ang mga board members kag indi sarang madiktahan.
Ginpahayag ni Hachuela kun wala sang respeto si Depon sa mga board members, respetuhon na lamang sini kuntani ang Sangguniang Panlalawigan bilang isa ka institusyon.
Ginpa-intiende man sini kay Depon nga ginboto kag may covenant sila nga mga board members sa mga pumuluyo nga nagpahamtang sa ila sa posisyon.
Gani obligasyon nila nga serbisyuhan ang mga pumuluyo.
