Ginapanindugan karon sang chairman sang Committee on Appropriations sang Sangguniang Panlalawigan nga wala ini nakabaton sang sulat gikan sa talatapan sang gobernador angut sa ginahinyo nga request para sa supplemental budget sang ospital.
Suno kay Board Member Jonathan ‘’Sonny’’ Besa nga wala ini sang ideya sa nangin statement ni Governor Contreras nga may pending request ini sa talatapan nga wala gin-aksyunan.
Ginklaro sang opisyal nga tanan nga request sang gobernador nga ginapalab-ot sa ila ang gin-aprubahan, apang ginpaidalum sa pagdebate sang mga katapu sang Sangguniang Panlalawigan.
Posible ang ginatumod ni Governor Contreras nga pending request sa ospital nga ginaalegar wala maaksyunan ang wala pa nakalab-ot sa iya opisina.
Ginpahayag ni Besa ang iya matandaan nga katapusan nga naaprubahan sang Sangguniang Panlalawigan nga gikan sa talatapan sang gobernador amo ang P2.5 million nga pondo nga magakadto sa CRC Isolation Unit kag pagrepair sang elevator sa kapitolyo probinsiyal.
Ang wala lamang maaprubahan amo ang request nga ilisan ang Capiz shell window kag ang request nga salakyan nga ma-detail sa talatapan sang gobernador.
Ginklaro pa ni Besa nga ang ila ginahinyo nga Allotment Released Order (ARO),dapat ma-released sang Executive department, bangud indi sila makasweldo nga mga board members sa ila nga staff.
Ginapanindugan sang opisyal nga wala sang rason ang gobernador nga ipton sila kag indi pag-i-release ang ila pondo bangud ministerial lamang ang papel sang gobernador.
