Luyag nga pa-imbestigaran ni Board Member Pepe Del Rosario ang drainage system kag flood control sa Roxas City kag mga banwa sa Capiz kasunod sang lapnagon nga baha nga natabo sa probinsya.
Sa privilege ni Board Member del Rosario, iya ginpahayag nga indi ini ang una nga bes nga nagabaha sa Roxas bangud apisar sa simple lang nga ulan, may mga areas na nga ginabaha gilayon.
Suno kay Board Member del Rosario, tion na nga hatagan sang pagtamod ang paghimo sang mabakod nga flood control kag i-improve ang mga drainage system sa syudad agud malikawan na ang pagbaha.
Pahayag niya, kinahanglan man nga magtukod sang permanente nga evacuation center kag indi nga isalig lang sa mga eskwelahan, mall kag simbahan ang matiniran sang evacuees.
Samtang, nagpalabtik naman sang istorya si Board Member del Rosario sa session kahapon, ginpahayag sini nga naka-eksperyensya ang kadam-an sang mataas nga lebel sang tubig baha sang Sabado, magluwas lang sa nagatinir sa mansion sa ibabaw sang bukid sa Milibili, Roxas City.
