ROXAS CITY – Ginklaro sang chairman sang Committee on Education sang Sangguniang Panlalawigan nga ang ginadihon nga ordinansa nga nagaduso sang institutionalized scholarship program sang gobyerno-probinsiyal ang mangin epektibo pa lamang sa school year 2020.
Ini ang ginpahayag ni Board Member Thea Faith Reyes sang mainterview sang Bombo Radyo.
Suno kay Reyes nga indi sakop sang amo nga ordinansa ang mga ‘existing’ scholars bangud kinahanglan nila nga magkuha liwat sang qualifying examination para sa bag-o nga scholarship ordinance.
Apang suno kay Reyes nga wala man nila ginpabay-an ang mga karon nga scholars bangud nahimo na ini nga masolusyunan sang provincial board.
Lauman suno kay Reyes nga sa bulan sang Disyembre maaprubahan na sang provincial board ang amo nga ordinansa kag sa bulan sang Enero 2020 makadihon na sang Implementing Rules and Regulations (IRR) agud ma-preparahan na sang gobyerno-probinsiyal ang pagbaton sang panibag-o nga mga scholars.
Pinaagi sa nasambit nga ordinansa suno kay Reyes, ma-institutionalized ang scholarship program sang gobyerno-probinsiyal kun sa diin bisan magbaylo pa sang administrasyon, indi na matandog ang mga scholars kag mangin tayuyon ang ila pagbaton sang bulig para sa ila nga edukasyon.
