ROXAS CITY- Nag-apelar sa karon angchairman sang Committee on Laws and Good Governance sa Sangguniang Panlalawigan sa gobernador sang Capiz kag alkalde sang Roxas City nga maghimo sang aksyon kag pa-imbestigahan ang ginaalegar pagkidnap kay Patroceño Don Chiyuto, CEO sang Double your Money Investment Scheme.
Sa interview sang Bombo Radyo kay Board member Eleuper ‘’Bulilit’’Martinez, ini na ang ensakto nga panahon para mapakita nanday Governor Esteban Evan Contreras II kag Roxas City Mayor Ronnie Dadivas ang ila nga suporta sa ginapakigbato sang mga Capizeño nga nadulaan sang daku nga kantidad matapos nag-invest sa investment scheme ni Chiyuto.
Suno kay Martinez makabulungol ang kalinong bangud sa wala pag-aksyon sang duha ka opisyal sang gobyerno nga dapat kuntani naghimo sang tikang para mabuligan ang mga na-biktima sang scammer nga si Chiyuto kag mabalik ang hard earned money sang mga investors.
Liwat ginpahanumdum sang opisyal sanday Governor Contreras kag Mayor Dadivas nga bilyones ang nadula sa mga Capizeño nga indi mahimo ibalewala lamang sang mga opisyal sang gobyerno.
Matandaan nga ginhinyo sang mga katapu sang Sangguniang Panlalawigan sa Securities and Exchange Commission (SEC) kag National Bureau of Investigation (NBI) nga indi pag-arestuhon si Chiyuto kun magapay-out ini ukon ibalik ang investment sang mga investors, antes kag sa Marso 31, 2021.
Apang ginkibot sang mga pumuluyo sang naglapta ang CCTV footage nga ginkidnap si Chiyuto sang armado nga mga kalalakinhan.
Madamo ang nagapati nga drama lamang ang ginaalegar pagkidnap kay Chiyuto bangud wala na ini sang plano nga ibalik pa ang kuwarta sang mga investors.
