ROXAS CITY -Ginkuwestion ni Board Member Thea Faith Reyes ang pamunuan sang Metro Roxas Water District (MRWD) kun ginpalab-ut na sa alkalde sang siyudad ang plano sini nga pagbakal sang tubig sa isa ka pribado nga supplier agud mahatagan sang bastante nga suplay sang tubig ang tanan nga mga concessionaires sang MRWD.
Sa ginpatigayon nga committee hearing sa Sangguniang Panlalawigan, ginapamangkot ni Reyes si MRWD General Manager Gonzalo Glenn Delgado kun ginpalab-ut na sini sa kay Roxas City Mayor Ronnie Dadivas ang plano sang talatapan nga magbakal sang tubig sa isa ka pribado nga supplier agud makahatag sang bastante nga suplay sang tubig sa mga consessionaires sini sa syudad kag probinsiya.
Suno sa kay Reyes nga may yara sang kinamatarong ang siyudad nga mahibal-an ang mga plano sang nasambit nga talatapan ihilabi nga kadam-an nga mga consessionaires sang MRWD amo ang mga residente sang siyudad.
Ginpahayag ni Reyes nga wala gintun-an sang pamunuan sang MRWD ang plano sini nga bulk water system nga mahimo makatuga sang rate increase sa balayran sang mga concessionaires.
Gindugang pa ni Reyes nga wala nagsugid sang kamatuoran ang consultant sang MRWD nga nagsiling nga wala sang rate increase nga matabo sa tion nga madayon ang plano sini nga pagbakal sang tubig sa isa ka pribado nga supplier.
Samtang ginrequest naman sang Sangguniang Panlalawigan ang feasibility study natuhoy sa plano sang MRWD.
