ROXAS CITY – Wala sang ideya ukon impormasyon ang chairman sang Committee on Education, Science and Technology sang Sangguniang Panlalawigan nga may yara sang nagakahinabo nga recruitment ground sang CPP-NPA sa mga unibersidad kag buluthuan sa probinsya.
Ini ang ginpahayag ni Board Member Thea Faith Reyes sang mainterview sang Bombo Radyo.
Suno kay Reyes nga hinalaan lang nila sang Committee on Peace and Order and Public Safety ang natuhoy sa nasambit nga isyu.
Sa pihak nga bahin, ginklaro ni Reyes nga wala sila nagapamulika kabaliskaran sa pahayag ni Provincial Administrator Edwin Chinel Monares matapos nga nagahinyo sila nga ipaiway anay ang pagbakal sang 30 ka mga units sang rescue vehicles nga gamiton sang probinsya.
Ginpahayag ni Reyes nga kuntani bakuna batuk sa COVID-19 ang iga-prayoridad sang gobyerno probinsyal para sa mga pumuluyo.
Apang, wala sila sang mahimo bangud yara sa gihapon nakadepende ang desisyon sa executive department sa pagpanguna ni Capiz Governor Esteban Evan Nonoy Contreras kun dayunon ang pagbakal sang nasambit nga mga salakyan.
Gin-athag sini nga indi buot silingon sang ila nga resolusyon nga nagapamalabag na sila nga mga board members sa desisyon sang gobernador sa baylo luyag lamang nila ipahibalo ang ila nga mga sentimyento.
Samtang, kadungan sang selebrasyon sang nagahilapit nga paskwa gin-anunsyo ni Reyes nga nagapatigayon ini sang “Noche Buena Nyo, Sabat Ko” kun sa diin magahatag ini sang paskwa sa mga pumuluyo nga residente lamang sang 1st District sang Capiz.
Ang himuon lamang ni amo ang pag-text sa numero nga 0917-323-8667 kun sa diin nabutang diri ang ila pangalan kag address.
Iga-raffle ini sa Disyembre 21 alas 9 sang aga kun sa diin may yara lamang sang 47 ka mga mapalaron nga makabaton sang paskwa nga 25 kilos sang bugas kag P1,000.
Mahibaluan nga 10 ka mga pangalan sa tagsa ka mga kabanwahanan sang Maayon, Pontevedra, Pres. Roxas, Panay kag Pilar nga magabaton sang 25 kilos sang bugas.
