ROXAS CITY – Nagpamatok ang pila ka mga residente sang Legaspi Ilawod, Brgy. V sining siyudad matapos nga ginkumpirmar ni Punong Brgy. Lorelie Aguirre nga isa ka boarding house ang magaserbi nga quarantine facility sang magapauli nga Locally Stranded Individuals ukon LSI’s.
Suno kay Juliet Soriano, residente sang nasambit nga barangay nga hugot ang ila pagpamatuk bangud madamo ang naga-istar sa lugar partikular na ang mga katigulangan kag kabataan sa palibot sang nasambit nga boarding house.
Ginpahayag pa sini nga nagakahangawa na sila bangud halos tanan nga mga LSI’s ang carrier sang COVID-19 sa probinsya.
Nakibot na lamang ini sang nahibaluan nga may yara sang magapauli nga mga LSI’s kag ang amo nga boarding house ang ginrentahan ni Aguirre agud mangin quarantine facility sang ila barangay.
Aminado naman ang nasambit nga punong barangay nga may sala man ini sa iya mga pumuluyo bangud wala sini anay ginkonsulta ang nasambit nga plano.
Samtang, gintinguhaan man sang amo nga opisyal nga mahatagan sang solusyon ang nasambit nga problema matapos nag promesa si Aguirre nga indi na sini pag patiniron ang maabot nga LSI’s sa ginrentahan nga boarding house.
