Ginkakibot sang mga kaupdanan sang biktima ang natabo sa ila boat captain nga si Robert Francisco.
Ginpahayag ni Zandro Anisco 47-anyos sang Barangay Culasi, anak sang tag-iya sang sakayan pandagat nga si Nelson Anisco matapos sila magdungka gikan sa ila nga pagpangisda, nag-inum pa sila sang mga kaupdanan.
Suno diri nga si Francisco pa ang nagluto sang ila pagkaon.
Apang ginkatingala nila nga nagtabuk sa pihak nga sakayan ang biktima kag nakita na lamang nila nga naglumpat ini sa dagat.
Ginaalegar pa ni Anisco nga ila pa ginsinggitan kag ginapasaka na ang biktima, apang wala ini nagbalik.
Ginapanindugan sini nga ila ginpangita ang biktima, apang wala nila ini makita.
Tobtob nga nabatian na lamang nila pagkaaga sa Bombo Radyo nga may nasapwan nga patay sa diin sang ila gintsekyar ila nakumpirma nga ini ang ila kaupod sa pagpangisda.
Samtang tuman ang pagtalagison ni Samybil Dorde, live-in partner sang biktima sang makumpirma nga ang iya partner amo ang ginareport nga nasapwan nga patay.
Suno sa ginang nga bag-o lamang nag-upod sa amo nga sakayan ang iya bana bangud sa sakayan sa Barangay Libas gid ini nagaupod sa pagpangisda.
Gintuad ni Dorde nga nakaangkon sila sang gamay nga away ni Francisco antes ini magsakay sa sakayan rason nga sa balay sang iloy sini nagtulog kag pagkaaga lamang nagbalik sa ila balay para kuhaon ang simcard nga gamiton sa pagtawag sa pamilya.
Nahibaluan sang ginang nga tatlo ka adlaw nga magapangisda sa lawud ang live-in partner kag kagab-I sila magadungka.
Natalana pa kuntani niya nga sugaton si Francisco, apang nakibot ini bangud bangkay na ang nagsugata sa iya.
Samtang indi madula kay Dorde ang posibilidad nga may foul play ang kamatayon sang biktima.
