ROXAS CITY – Nagparekord sa Roxas City PNP ang boat captain sang FB Lady Zoe B-C nga si Mac Bryan Lavezora sang Sitio Luyo, Barangay Culasi, sining syudad matapos ginpahog kag ginpangkuha ang kagamitan sa ila nga sakayan sang mga persona nga nakasakay sa walo ka mga sakayan pandagat sa kalalawran sang Barangay Olutayan, Roxas City.
Ba-se sa alegasyon sang tagreklamo padulong ang ila sakayan sa Masbate apang sang nag-agi sila sa kalalawran sang Olutayan, ila nalabayan ang grupo sang mga mangingisda sakay sa walo ka mga sakayan nga nagahaboy sang dinamita sa dagat.
Gilayon sila nga ginpalibutan sang nasambit nga mga sakayan kag ginsenyasan nga magpondo.
Sa ila pagpondo, nagsaka ang anum ka mga kalalakinhan nga nagasuksok sang bonnet sa ila sakayan nga armado sang binangon.a
Ginkuha ang 47 ka mga pataw ukon floaters nga nagabalor sang P23,500, pisi nga P57,000 kag lambat sang sakayan nga FB Lady Zoe B-C.
Antes nagpanaug sa sakayan ang mga suspek, ginpahog sila sang amo nga kalalakinhan nga pagapatyon kun liwat mag-agi sa amo nga area.
Samtang nakilala sang tagreklamo ang isa sa 20 ka mga nagsaka sa ila sakayan kay alyas Bulag nga taga Barangay Olutayan bangud wala ini nakasuksok sang bonnet kag ila man natandaan ang duha ka mga sakayan.
