Naglab-ot na sa 204 apprehensions ang nahimo sang Bureau of Custom (BOC) subong nga tuig, nga nagresulta sa pagkakumpiskar sang tubtob sa P41.58 billion.
Kalakip sa mga produkto nga nahimo sa sini nga makumpiska ang mga ginpalusot nga sigarilyo, mga produkto nga petrolyo, agricultural products, kag iban pa nga smuggled kag peke nga mga produkto.
Sa mga nakumpiska nga sigarilyo, naglab-ot sa 8,816 cases ang nahimo sini nga masabat kag ginabulubanta nga nagabalor sang P595.22 million.
Ang mga agricultural products nga gintuyo nga isulod sa Pilipinas apang napamalabagan ang ginabulubanta nga nagabalor sang P100 million.
Suno pa sa BOC, resulta ini sang mas lapnagon nga anti-smuggling campaign sang ahensiya, kadungan sang pagbantay sa mga pantalan, pwerto, kag iban pa nga point of entry.
Una na man nga ginreport sang ahensiya nga nalampuwasan na sini ang revenue collection target sa una nga katunga nga bahin sang 2024 sang tubtob sa 2.98% kun sa diin nasulod sini ang tubtob sa P455.8 billion sumugod enero tubtob hunyo.
Ini ang kabaylo sang P13.18 billion nagikan sa target collection nga P442.62 billion.
