SIGMA, CAPIZ – Gintupok gid sang kalayo ang isa ka bodega sa Barangay Oyong, Sigma, Capiz.
Totally-burned ang bodega nga ginapanag-iyahan ni Felix Progio, 51 anyos sang nasambit man nga lugar.
Base sa inisyal nga impormasyon gikan sa Sigma Municipal Fire Station, nagpadulong sa iya nga bodega si Progio agud tsekyaron kuntani ang pila sini ka mga kagamitan apang naabtan niya ginatupok na ini sang kalayo.
Gilayon ini nagpanawag sang responde apang nabudlayan pa ang mga bombera nga makasulod sa lugar.
Ginapahayag nga madasig nga naglapta ang kalayo bangud sa masingkal nga init kag mabaskog nga hangin kag ginapahayag may mga krudo pa sa sulod sang bodega.
Mahibaluan duha ka mga fire trucks ang nagpadulong sa lugar para magresponde apang nadugayan sila bangud sa tuman ka kitid nga alagyan.
Ginabulubanta nga nagalab-ot sa P180, 000 ang kabug-usan nga kahalitan sang nasambit nga sunog.
Padayon naman ini nga gina-imbestigahan sang mga otoridad agud matumod ang gintunaan sang kalayo.
