ROXAS CITY – Napuno sang emosyon ang female medical ward sang Roxas Memorial Provincial Hospital matapos mahatagan sang katumanan ang madugay na nga handum nga makasal sang isa ka mister nga PWD kag asawa nga may stage 4 cancer.
Nangin saksi sa pagtambi-palad nanday Eddy Sarad 53-anyos at Gloria Pacarya-Sarad 55-anyos, ang mga personnel sang Bombo Radyo nga nagserbe nga maninoy sa kasal kalakip na ang mga nurses kag doktor sa nasambit nga ospital.
Wala nalikawan nga magtulo ang luha sang mga nagtambong sa seremonya nga ginpangunahan ni Reverend Father Milwaulk Anthony Navarrosa, bangud sa nakita nga tuman nga kalipay sa nawong sang mag-asawa samtang ginapatigayon ang kasal sa sulod mismo sang ospital sa diin na-confine si Gloria.
Suno kay Eddy nga sa sulod sang 14 ka tuig nila nga pag-upod, wala nadula sa iya tagipusoon ang handum nga mapakasalan ang asawa.
Ginpasalamatan man sini ang asawa bangud sa pagbaton sa iya sa pihak sang kasablagan sa lawas.
Nagpromesa man si atubang sang mga nagsaksi sa ila kasal si Eddy nga higugmaon sini tobtob sa kamatayon ang asawa nga si Gloria.
