Ginkilala ang Bombo Radyo Philippines bilang Best Radio Network sa prestihiyoso nga Pro Patria Journalism Awards.
Ini isa ka recognition program nga ginapresentar kada tuig sang Rotary Club of Manila.
Ginhatag ang award kadungan sanag selebrasyon sang Rotary Club of Manila sang Philippine Independence Day sa Makati City.
Ginpasidunggan ang Bombo Radyo Philippines bangud sa mabakod kag malawig na nga commitment sa paghatag sang masaligan nga balita, impormasyon, kag serbisyo publiko sa mga Pilipino sa bilog nga pungsod.
Ginpahayag sa award nga nagapabilin ang Bombo Radyo Philippines bilang isa sa “most trusted sources of news and information”.
Gindayaw man ang mabakod nga presensya sang network sa mga probinsya kag ang sahi sang programming nga nagatutok sa komunidad amo man ang pagdul-ong sang madasig nga balita kag serbisyo-publiko sa ordinaryo nga mga Pilipino.
Ini nga award nagakilala man sang daku kag importante nga papel sang Bombo Radyo sa tion nga may mga bagyo, emerhensya, ukon ano man nga kalamidad kun sa diin nagabulig ang mga estasyon sang network agud nga mapahibalo ang publiko sang pinakaulihi nga mga impormasyon para sa ila nga seguridad.
Nakabutang man sa award ang reputasyon nga nahimo sang Bombo Radyo Philippines sa serbisyo-publiko kag ang pag-ulikid sa mga komunidad nga ginapangalagaran sini.
Yari ang pag-anunsyo sang award para sa Bombo Radyo Philippines.
Ang Pro Patria Journalism Awards amo ang isa sa pinaka-respetado nga journalism recognition programs sa Pilipinas.
Ang termino nga “Pro Patria” amo ang Latin phrase nga nagakahulugan nga “For Country” ukon “para sa pungsod.”
Nagapakita ini sang misyon sang programa nga kilalahon ang mga mamamahayag kag media organizations nga nagatib-ong sang kamatuoran, nagapabakod sang demokrasya, nagapabakod pa sang patriyotismo, kag nagapangalagad sa nasyon pinaagi sa responsable nga sahi sang journalism.
Ginakilala diri ang media practitioners kag mga institusyon nga naga-demonstrar kun ano ang patas, wala sang kahadlok, kamatuoran, moral responsibility, commitment sa hilway nga expression, kag dedikasyon agud nga mapahibalo ang publiko sang insakto nga impormasyon.
Ginapresentar ini sang Rotary Club of Manila nga amo ang una kag pinakadumaan nga Rotary club sa Asya nga natukod sang 1919.
Ang Pro Patria Journalism Awards amo ang isa sa flagship recognition programs sang organisasyon kag ginakabig nga isa sa pinakaprestihiyoso nga pagkilala sa journalism diri sa Pilipinas.
======================
Para sa Bombo Radyo Philippines, ang pagkilala bilang BEST RADIO NETWORK sa Pro Patria Journalism Awards nga ginpresentar sang Rotary Club of Manila ang may mas madalom nga kahulugan sangsa isa lamang ka pasidungog.
Ang “Pro Patria,” nga nagakahulugan “Para sa Bayan,” nagaserbe nga pahanumdom nga ang journalism indi lamang isa ka propesyon kondi isa ini ka serbisyo sa publiko, isa ka pagpreserbar sang kamatuoran, kag isa ka mabakod nga panindugan para sa demokrasya kag para sa pumuluyong Pilipino.
Sa masobra anum ka dekada humalin sang gintukod ini sang Hulyo 6, 1966, ang Bombo Radyo Philippines nangin masaligan nga kaupod sang mga Pilipino sa panahon sang kadalag-an, krisis, kag pagbag-o.
Nagtutok ini sa mga eleksyon, mga kalamidad, mga isyu sosyal, kag mga istorya sa adlaw-adlaw gikan sa nagkalainlain nga mga komunidad sa bug-os nga pungsod.
Sa tion sang putukputukan sang Martial Law, ang Bombo Radyo amo lamang ang provincial radio network nga makasarang sa pagdul-ong sang mga balita gikan sa Malacañang kag Metro Manila sa mga probinsya.
Ang misyon sini maathag na halin sadto: ang paghatag sang tampad nga impormasyon, pagreport nga wala sang kahadlok, kag pag-alagad sa mga tawo sang responsable.
AV of BOMBO HERMAN BASBAŇO, Vice President of Bombo Radyo Philippines – AV2 – BOMBO HERMAN – SERVICE
===========
CJ
Sa acceptance speech ni Bombo Herman Basbano para sa BEST RADIO NETWORK AWARD sa Pro Patria Journalism Awards, ginpasalamatan sini ang mga nahimo ni DR. ROGELIO M. FLORETE.
Suno kay Bombo Herman, sa tunga sang mga nahimo sang Bombo Radyo Philippines amo ang visionary leadership ni DR. ROGELIO M. FLORETE, ang Chairman of the Florete Group of Companies, ang diversified conglomerate nga may business interests sa media paagi sa Bombo Radyo Philippines, banking, bulk water supply, property development, pawnshop and jewelry, aquaculture and agriculture, kag iban pa.
Labaw pa sa sini nga pagkilala, ang pinakadaku nga legasiya ni Dr. Florete amo ang kultura nga natukod sini sa Bombo Radyo nga amo ang kultura sang disiplina, integridad, pag-ulikid, kag serbisyo.
Sa idalom sang liderato ni Dr. Rogelio M. Florete, nagsangkad ang Bombo Radyo sa Pilipinas.
Ang Bombo Radyo Philippines network ang labaw pa sangsa mga broadcasters lamang bangud sila nangin partner sang komunidad, nangin tag-responde kun may kalamidad, kag nangin palaagyan sang public accountability paagi sa prinsipyo nga FAST, FIRST, AND RIGHT.
Suno pa kay Bombo Herman Basbano, ang award nga RADIO NETWORK OF THE YEAR AWARD wala lamang ginapanag-iyahan sang network kundi isa man ka pagkilala sa dedikasyon sang amon Chairman nga si DR. ROGELIO M. FLORETE, our Captain in the Industry!
