Ginkilala sang Department of Social Welfare and Development (DSWD) Region 6 ang Bombo Radyo Roxas bilang “Most Supportive Media Partner for Radio” sa Media Appreciation Ceremony nga ginhiwat sa Probinsya sang Guimaras.
Ginpasidungga ang istasyon sa padayon nga suporta sa pagpalapnag sang impormasyon nahanungod sa nagkalain-lain nga programa, proyekto, kag serbisyo sang DSWD.
Pinaagi sa regular nga balita kag interviews, nakabulig ang Bombo Radyo Roxas sa paghatag sang importante nga impormasyon sa mga komunidad sa bug-os nga probinsya.
Sa interview sang Bombo Radyo Roxas kay Ms. KATHERINE JOY LAMPREA, Assistant Regional Director for Operations sang DSWD Region 6, importante ang papel sang media sa pag-angot sang gobyerno kag pumuluyo agud mas mahapos nga mapalab-ot sa publiko ang insakto kag nagakaigo nga impormasyon.
Magluwas sa pagkilala sang istasyon, nakabaton man sang Individual Special Award si Bombo Lynd-C Bade, Acting Assistant Station Manager sang Bombo Radyo Roxas.
Ginkilala sang DSWD ang aktibo nga papel ni Bombo Lynd-C sa pag-interview sa mga pesonnel sang DSWD sa nagkalain-lain nga social welfare programs, mga isyu nga gina-atubang sang publiko, kag mga programa nga nakatutok sa pagbulig sa mga benepisyaryo.
Ang kasubong nga pagkilala nagapakita sang mabaskog nga pag-updanay sang DSWD kag Bombo Radyo Roxas sa pagpasanyog sang ihibalo sang publiko kag serbisyo sa komunidad.
