ROXAS CITY – Ginbawi na ang border restriction nga ginpatuman sa Barangay Manibad, Mambusao, Capiz matapos nga isa ka residente ang nagpositibo sa coronavirus disease 2019 (COVID-19).
Ginpahayag ni punong barangay Violeta Labo nga epektibo subong nga adlaw, ginbawi na sang Mambusao COVID-19 Task Force ang border restriction, apang pabilin ang enhance community quarantine protocol sa ila nga lugar kag kinahanglan sa gihapon sang quarantine pass kag hugot ang pagpatuman sang curfew hours.
Suno sa opisyal nga ang pagbawi sang border restriction ang ba-se sa pag-aprubar sang Rural Health Unit sang banwa sang Mambusao matapos nga nagtakup na ang 14 diyas nga quarantine period sa nakaangkon sang close contact sa positive COVId-19 patient.
Apang sa mga na-identify nga malapit nga himata sang pasyente nga may yara sang close contact diri, gindugangan sang napulo ka adlaw nga extension ang ila quarantine agud masiguro nga wala sila nagasuprer sang mga flu like symptoms sang coronavirus disease.
May gin-assign man nga konsehal nga kada adlaw nagatsekyar sa kinahanglanon sang mga Person’s Under Monitoring (PUMs) nga may close contact sadto sa pasyente nga nagpositibo sa COVID-19 sa diin wala sila sa gihapon ginapahanugutan nga makaguwa sa ila balay.
Apang sa nakatapos na sa 14 days quarantine, mahimo na sila nga makaguwa kag makapamakal sang ila kinahanglanon sa balay, apang kinahanglan nga isa lamang ka miyembro sang tagsa ka household kag dapat dalhon sini ang home quarantine pass.
Nahibaluan man nga ginhatagan sang thermometer ang kada PUM’s agud sila mismo ang maka-monitor sa ila body temperature.
Samtang nakapanagtag na sang relief goods ang barangay sa mga pumuluyo.
Ginkalipay man sa pag-anunsyo ni Kapitan Labo ang donasyon nga nabaton gikan sa mga indibidwal nga may mabinulawanon nga tagipusoon sa diin nakaambit man diri ang mga frontliners nga nagasakripisyo sang ila kaugalingon nga kabuhi agud lamang indi maglapta ang coronavirus 2019.
