ROXAS CITY – Hugot nga ginapatuman ang border restriction sa mga tawo nga nagapadulong sa siyudad sang Iloilo sa Barangay Aglalana Dumarao, Capiz.
Ini matapos ginpirmahan ni Iloilo Governor Arthur Defensor Jr., ang Executive Order No. 128-E kun sa diin ipatuman ang travel restrictions sa nasambit nga probinsya humalin sa Hulyo 4, 2020 bangud sa pamahog sang Coronavirus Disease ukon COVID19.
Kalakip sa mga nagapatigayon sang checkpoint ang pila ka mga kapulisan sang banwa sang Dumarao kag Iloilo subongman ang mga katapo sang Provincial Disaster Risk Reduction and Management Office ukon PDRRMO sang Capiz kag Iloilo.
Sa interview sang Bombo Radyo kay Police Captain Larnel F. Frial sang Dumarao PNP nga hugot ang ginapatigayon nga checkpoint sang mga kapulisan kaupod ang PDRRMO sa mga pasahero nga nagapadulong sa siyudad sang Iloilo kag Capiz.
Ginpahayag ni Frial nga kinahanglan may yara sang iprisentar nga valid id ukon certificate of residency ang mga tawo nga nagapadulong sa siyudad sang Iloilo.
Nahibaluan nga wala ginapahanugotan ang mga tawo nga magsulod sa border sang Iloilo kun wala sang nagakaigo nga mga rekisitos.
Dugang pa ni Fial nga humalin ginpatuman ang General Community Quarantine sa probinsya sang Capiz, nagapabilin nga nagabantay ang mga kapulisan sa mga pasahero nga nagasulod sa nasambit nga border.
Magluwas diri, ginatsekyar man ang temperatura sang mga tawo pinaagi sa thermal scanner.
Matandaan nga tubtob subong nga adlaw lamang Hulyo 3, 2020 ginhatagan sang plaso ang mga residente sang probinsiya sang iloilo nga yara sa Capiz, Aklan, Antique, Negros Occidental kag Bacolod City nga makapauli sa nasambit nga probinsiya.
