ROXAS CITY – Gintambakan sang buga ang karsada sa Barangay Liong, Roxas City nga lusot sa Barangay Intampilan, Panitan, Capiz agud indi na makaagi ang pasaway nga mga motorista nga ginahimo lakturan ang nasambit nga dalan.
Ginpahayag ni Kagawad Rene Bacelonia sang Barangay Liong nga mismo ang alkalde sang syudad ang nagpadala sang buga, agud itambak sa karsada nga masami nagaserbe nga lulutsan sang iban nga mga motorista nga wala nagaagi sa border security checkpoint.
Aminado man ang opisyal nga madamo nga mga residente nga nagaagi sa lugar ang nagreklamo sa pagpatambak sang buga, apang ginpalab-ot nila nga pamaagi lamang ini sang gobyerno agud makontrol ang mga tawo nga nagasulod sa Roxas City kag indi maglapta ang COVID-19.
Suno naman kay barangay tanod Jimmy Cervales nga sadto pa ila na ginabantayan ang nasambit nga lugar agud indi makaagi ang indi mga residente sa ila nga border, gani para sa ila nga daku nga bulig ang pagpatambak sang buga.
