Ginkumpirmar ni Philippine National Police (PNP) Spokesperson PBGen Jean Fajardo nga ang boxing ring sa Rizal Memorial Coliseum, nga natalana gamiton sa charity boxing match nga pagahiwaton sa tunga ni PNP Chief PGen. Nicolas Torre III kag Acting Davao City Mayor Sebastian ‘Baste’ Duterte subong nga Domingo, Hulyo 27, 2025, gina-assemble kag ginakay-o subong.
Una, nagbutang si ‘Baste’ Duterte sang kondisyon nga antes batunon ang hangkat ni Torre, dapat niya anay pangabayon si Presidente Ferdinand Marcos Jr. kag ang tanan nga napilian nga opisyales nga magpaidalom sa hair follicle drug test.
Apisar sini, hugot sa gihapon nga nagahanas si Torre bilang kabahin sang iya preparasyon sa ila palaabuton nga hampang.
Sa una nga adlaw, nagpaidalum sa boxing training ang hepe sa PNP Sports Center sa bulig sang isa ka trainer nga nangin sparring partner niya sa ring samtang naghimo ini sang 10 ka rounds sang jogging sa PNP Oval sa pihak sang malain nga panahon kag mabaskog nga pag-ulan.
Samtang, ginpasalig ni Torre nga bisan indi magpakita si Mayor Baste sa ila natalana nga hampang sa Domingo, magapakita sa gihapon ini agud maghatag sang relief goods sa mga pumuluyo nga apektado sang mga bagyo kag habagat sang nagligad nga mga semana.
