MAAYON, CAPIZ – Patay ang isa ka miyembro sang Barangay Peacekeeping Action Team (BPAT) matapos nga gintiro-patay sa guwa sang ila puluy-an sa Barangay New Guia, Maayon, Capiz takna alas 10:30 kagab-i, Abril 10, 2025.
Ginkilala ang biktima nga si Felizardo Aro Agris Sr., 65-anyos, samtang ang suspek naman amu si Joel Borlado de Mayo alyas “Nono”, 45-anyos kag lunsay mga residente sang nasambit nga lugar.
Suno kay PMAJ Syril Punzalan, Hepe sang Maayon Municipal Police Station, base sa ila ginpatigayon nga imbestigasyon, samtang naga-istorya ang biktima sa iya pakaisa nga si Teodoro Beronio Agris sang hinali nalang ini ginluthang sang suspek nga naigo sa iya likod gamit ang 12 gauge homemade shotgun ukon “Pugakhang”.
Gilayon nga gindala ang biktima sa Bailan District Hospital apang gindeklarar ini nga dead on arrival sang doktor nga nag-atendir.
Sa karon, padayon pa ang imbestigasyon sang Maayon PNP kun ano ang motibo sang suspek sa pagtiro-patay sa biktima.
Nagapadayon man ang hot pursuit operation sang kapulisan batuk sa suspek nga madasig nga nagpalagyo matapos nga nakumiter ang krimen.
