ROXAS CITY – Padayun nga ginabulong sa ospital ang katapu sang Barangay Police Action team ukon BPAT kag lalaki nga ginbuligan sini matapos nga mabun-an sang apat ka mga suspek sa Barangay Tiza, Roxas City.
Nag-angkon sang pilas sa lawas ang BPAT member nga si Rolando Sereneo Jr., kag pilas sa hawak kag dalunggan ang naangkon ni Joey Morales sang Ellieta St., Roxas City matapos ginbuno sang mga suspek nga sanday Vincent Lacuesta alyas Bon-Bon, Glen Equinan kag certain Andrew Joey Lacuesta alyas Palay.
Sa interview sang Bombo Radyo kay Superintendent Dante Tayco, hepe sang Roxas City PNP, ginpahayag sini nga nagaguwa sa imbestigasyon sang pulisya nga magapauli na ang biktima nga si Morales sakay sa motorsiklo sang lambatan sang naga-inum nga mga suspek.
Nakaangkon sang mainit nga kumprontasyon sa tunga sang magtimbang nga bahin tobtob nagresponde ang BPAT nga si Sereneo nga nakabati sa komosyon.
Apang ginkakibot nanday Morales kag Sereneo sang makita nga may patalum ang mga suspek.
Wala na nakalikaw pa ang duha sang bun-on sang mga suspek.
Samtang naaresto sang nagresponde nga mga pulis ang tatlo sa apat ka mga suspek nga sanday Vincent Lacuesta, Glen Equinan kag certain Andrew.
Padayun man ang pag-ayam sang pulisya sa nakapalagyo nga si Joey Lacuesta alyas Palay.
