BANICA, ROXAS CITY – Ginpasidunggan bilang 2nd Runner Up sa 2024 Search for the Most Outstanding Barangay Tanod sa Regional Level- Component City category ang Barangay Banica, Roxas City.
Sa interview sang Bombo Radyo kay Punong Barangay Mike Xander Agrasada, ginkalipay nila sang iya mga pumuluyo ang nasambit nga pasidungog nga ginhatag sa ila kag ini bangud man sa pagtimakas sang Barangay council.
Mahibaluan personal nga nagpadulong sa ila barangay ang katapo sang Department of the Interior and Local Government (DILG) agud personal nga i-award.
Suno kay PB Agrasada, tatlo lamang sila ka mga barangay nagpasakop sa nasambit nga aktibidad kung sa diin ginpasidunggan bilang 1st runner-up ang Barangay Talongonan, Passi City, Iloilo kag nagkampeon naman ang Barangay 5, San Carlos City, Negros Occidental.
Matandaan nga makapila na ka beses nga nakakuha sang kaangay sini nga award ang ila barangay kaangay na lamang sadtong 2018 kag 2019.
Bangud sini, nagpalab-ot ang Punong Barangay sa iya mga aktibo nga Barangay Tanod sa ila indi matupungan nga sakripisyo agud lamang mahimo ang ila tagsa ka mga responsibilidad sa ila barangay.
