BANICA ROXAS CITY – Kumpirmado nga bangud sa sakit nga dengue ang rason sang ginkamatay sang isa sa mga pumuluyo sa New Road, Barangay Banica, Roxas City.
Sa interview sang Bombo Radyo kay Punong Barangay Mike Xander Agrasada sang Brgy. Banica, ginpahayag sini nga ini mismo ang ginkumpirmar sang iloy sang biktima.
Mahibaluan nga ang nasambit nga biktima ang isa ka 11-anyos nga lalaki.
Suno kay Agrasada nga sa pahayag sang iloy antes paman naglain ang pamatyag sang bata sini una na sila nga nagikan sa Barotac, Iloilo, kun sa diin pag-abot sa ila natalupangdan na lamang niya nga malain na ang pamatyag sang iya bata rason nga gilayon sila nga nagpa-check up sa doctor kag diri naguha ang test nga negatibo sa dengue.
Apang makaligad ang pila ka adlaw, daw kaangay nga wala sang pagbag-o sa iya bata rason nga ginpakamaayo na lamang nila nga magpa-admit sa isa ka pribado nga ospital kag didto naguha nga positibo na ini sa dengue.
Ginpahayag man ni Agrasada nga bangud duha ka strain sang dengue ang nag-igo sa biktima rason nga madasig lamang ini nag-epekto sa lawas sang pasyente.
Matandaan nga yara sa ika-duha nga listahan ang Barangay Banica sa may pinakamadamo nga kaso sang nasambit nga balatian.
Samtang, ini man ang labing una nga record sa ila barangay nga may ginbawian sang kabuhi bangud sa sakit nga dengue.
Panugyan ni Agrasada sa iya mga nasakupan nga ipabilin nga matinlo ang palibot sa tanan nga oras kag hibaluon kung anu ang mga dapat himuon agud malikawan nga malatnan.
