ROXAS CITY – Ginapangita na karon ang barangay kagawad kalakip ang duha ka mga himata nga suspek sa pagluthang sa isa ka lalaki sa thanksgiving party sang nagdaug nga barangay kagawad sa Barangay Talon, Roxas City.
Nag-angkon sang pilas sa hita malapit sa kinatawo nga naglapus sa alatrasan ang biktima nga si Salmar Aringo 28-anyos sang banwa sang Ivisan, apang temporaryo nga naga-estar sa Barangay Talon.
Nagakinasadya sa balay ni kagawad Mirasol Dordas sang hinali nga nagsulod sanday barangay kagawad Raul Santos alyas Jojo, Christopher Santos alyas KingKing kag Mark Anthony Santos alyas Bingo.
Matapos makita si Aringo, hinali ini nga ginluthang kag wala pa nakuntento ang mga suspek gintapak tapakan pa ang biktima ni Kingking ginluthang liwat ni Kagawad Raul, apang wala naglupok.
Gilayon nga gindala sa ospital ang biktima nga karon ginpadangat sa ospital samtang madasig nga nagpalagyo ang mga suspek matapos ang insedente.
Madugay nga hiligut-anon sang biktima kag mga suspek ang ginatan-aw nga motibo sa insedente.
