PONTEVEDRA, CAPIZ – Nagdepensa ang barangay kagawad sang Barangay Lantangan, Pontevedra natuhoy sa ginaalegar nga siya ang yara sa likod sang pagluthang-patay sa mag-utod nga Bangud sa sulod sang binaylehan sa Sitio Rosario sa amo nga barangay.
Sa interview sang Bombo Radyo kay Kgwd. Joseph Manican, ginpahayag sini nga wala sang kamatuoran ang ginapatuto sa iya nga ini ang nagluthang sa mag-utod nga sanday Felome Bangud, 42 anyos kag Melfer Bangud, 34 anyos.
Suno diri nga antes pa man natabo ang pagpangluthang, ginpalapitan siya ni Felome kag gin-agbayan kun sa diin iya nabatyagan nga kasubong may nakasukbit ini nga sanduko sa iya nga kilid.
Apang suno kay Manican wala niya man ginkuha ang nakasukbit sa kilid ni Felome kag ginpanugyanan niya lamang ini nga indi magtuga sang gamo.
Apang nakibot na lamang ini sang ginpalapitan siya sang manghod ni Felome nga si Melfer kag gin-ayad sang buno gamit ang screw driver.
Suno diri nga nadaplisan lamang siya sang screw driver bangud iya ini nga napunggan tubtob nga sila ang nagdumugay.
Samtang nagadumugay, aminado si Manican nga mangin siya ang nakibot sang makabati ini sang asud-asod nga lupok sang armas luthang.
Diri na suno sa iya ginbutong sang wala matumod nga persona si Melfer kag ginapahayag nga may igu na sang bala sa iya nga lawas.
Didto kag iya man nakita nga nagahuray-ad kag duguon ang magulang nga si Felome bangud naigu man ini.
Apang nagapanindugan si Manican nga indi siya ang nagluthang sa duha bangud wala siya sang bitbit nga armas-luthang sang gab-i nga natabo ang krimen.
Nagdalikyat ini sa pagpauli bangud suno sa iya ginapapauli na siya sang iya pamilya bangud sa paghangawa nga maulamid pa ini sa natabo.
Aminado naman si Manican nga sadto may ginapanag-iyahan siya nga lisensiyado nga armas apang madugay na ini nga wala sa iya.
Panindugan ni Manican nga madamo ang makapamatuod nga inosente siya kag wala sang kahilabtanan sa pagluthang sa mag-utod nga Bangud.
Ginklaro man ni Manican nga nagpadulong ini sa estasyon sang pulisya agud magpa-blotter natuhoy sa natabo kag indi agud isungka ang iya nga kaugalingon.
Nakahanda man si Manican nga atubangon ang mga otoridad kag pamatud-an nga indi siya ang may kahimuan sa nasambit nga krimen.
