PONTEVEDRA, CAPIZ- Nakahunong na karon sa Pontevedra Municipal Police Station ang isa ka barangay kagawad nga ginaalegar nagluthang sa mag-utod sa isa ka binaylihan sa Sitio Rosario, Barangay Lantangan, Pontevedra, Capiz.
Matandaan nga patay ang 42 anyos nga lalaki samtang kritikal naman ang manghod sini matapos nga ginaalegar ginluthang sang suspek nga si Barangay Kagawad Joseph Manican, 53 anyos sang nasambit man nga lugar.
Ginkilala naman ang napatay nga si Felome Bangud, 42 anyos kag residente sang Sitio Lunok, sang nasambit nga barangay samtang kritikal naman ang manghod sini nga si Melfer Bangud, 34 anyos.
Base sa inisyal nga imbestigasyon sang Pontevedra PNP, may nagluntad nga komosyon sa binaylihan sang nabatian na lamang ang madamo nga lupok gikan sa wala matumod nga armas luthang.
Naka-angkon sang pilas sa dughan si Felome nga gintunaan sang iya kamatayon samtang ang manghod sini ang napilasan sa tyan kag daplis sa dughan.
Narekober sa lugar ang mga basiyo sang ginapatihan kalibre .45 nga armas.
