ROXAS CITY – “Diretsu na ina ni Kapitan Okpura sa pagpasaka sang panumbungon apang may yara man kami sang inug-counter batuk sa iya” .
Ini ang matigdas nga ginpahayag ni Barangay Kagawad Romel Balguma matapos nga ginpasakaan ni Punong Barangay Einstein Okpura ang 7 ka mga barangay kagawad sini kalakip na ang ila SK Chairman nga si Cyril De Juan.
Sa interview sang Bombo Radyo kay Balguma nga posible ginkadismaya ni Okpura ang desisyon nila nga mga barangay kagawad sa pagpili kay Nelson Aquines bilang bag-o nga treasurer sang ila barangay rason nga ginpasakaan sila sang panumbungon sa office of the ombudsman.
Suno kay Balguma nga ginpili nila si Nelson Aquines bangud nakitaan nila ini sang potensyal pag-abot sa mga paper works.
Ginpahayag pa sini nga indi man imposible nga magapasaka man sila sang panumbungon batuk sa nasambit nga punong barangay.
Matandaan nga indi magpasugot si Okpura bangud ang luyag sini nga magpungko bilang bag-o nga treasurer amo si Regina Olivare .
Apang, hugot gid nga nagpamatuk ang mga kagawad bangud sa ginaalegar iregularidad kasubong sa pagbaton sang sweldo sa BHW kag empleyado sang City Government.
Dugang pa sini nga kuntani maintiendihan man ni Okpura ang sitwasyon bangud tuman na nga naapektuhan ang ila nga barangay kag mga pumuluyo sa ila isyu.
Mahibaluan nga nagalab-ot na sa 7 ka bulan nga wala sang kuryente kag tubig ang ila barangay hall kag wala man sila kabaton sang ila honorarium.
Aminado man si Balguma nga kulang sila sa kooperasyon rason nga wala sila naga-intiendihanay.
Samtang, nagalaom naman sila nga kuntani mahatagan na sang solusyon ang mga problema sa ila nga barangay antes magtakop ang tuig 2020.
