SAPIAN, CAPIZ- Ginpa-bombo sang isa ka pumuluyo sang Sitio Naasog, Barangay Majanlud, Sapian, Capiz ang isa nila ka Barangay Kagawad bangud sa ginapahayag indi patas nga pagpanglista para sa ayuda.
Sa interview sang Bombo Radyo kay Sally Vista, tagreklamo kag residente sang nasambit nga lugar, iya ginpahayag nga kaangay ginpili lang ni Barangay Kagawad Maria Luz Garcia ang ginlista sa ila Sitio para sa ayuda nga naapektuhan sang mga bagyo nga naeksperyensyahan sang probinsya.
Suno kay Vista, sa ila nga Sitio, anom lang ang gin-lista kag wala siya ginlakip.
Pahayag nya, ginhambalan siya sang nasambit nga Kagawad nga ang gin-bahaan lang ang makaambit sang ayuda, apang suno sa iya, may gin-lista si Kagawad nga wala man ginbahaan kag sila nga ginbahaan amo ang wala sa listahan.
Nagapanawagan naman ang tagreklamo nga sabton sang nasambit nga Kagawad ang iya nga ginpa-bombo.
Samtang, bukas naman ang istasyon sang Bombo Radyo Roxas para sa pagpaathag sang nasambit nga Kagawad.
Interviewed by Bombo Francis Biñas
