Suportado sang mga opisyal sang Barangay Ambilay, Panitan, Capiz ang ginpaguwa nga Memorandum Circular No. 2026-009 sang Department of the Interior and Local Government (DILG) ukon ang “Encouraging the Enactment of Local Ordinances for Safer Cities: A Call to Actions for Local Government Units”.
Sa interview sang Bombo Radyo kay Punong Barangay Juan Deita Baulite sang amo nga barangay, iya ginpahayag nga manami ang amo nga programa agud nga mas mangin organisado kag disiplinado ang mga pumuluyo.
Suno kay Baulite, kasunod sang pagapanaog sang DILG sa amo nga kasuguan, gilayon ini nga nagpatawag sang pagsinapol kaupod ang iban pa nga mga opisyal kag iban pa nga mga natungdan agud mapahibalo sa mga residente kag mapatuman sang husto ang amo nga mandatu.
Pahayag niya, sang wala pa ang amo nga mandatu, nagamando naman ang mga pumuluyo nga bawal maglakat sa dalan nga wala sang bayo, wala man suno sa iya sang nagalapas sa curfew nga las 10:00 sa gab-i kag wala sa amo nga mga inoras, wala naman sang may nagaginahod kag inom-inom sa higad sang dalan.
Dugang pa sang natungdan, padayon nga nagamonitor ang mga tanod kag mga opisyal sang ila nga barangay, agud masigurado ang kalinong kag katawhay sa palibot.
Nagapasalamat naman ini sa mga pumuluyo nga iya nasakupan sa kooperasyon sa mga mandato kag patakaran nga ila ginapatuman.
