Ginkalipay sang Barangay officials sang Tiza, Roxas City, ang pag-kooperar sang mga motorista kag pumuluyo sa dry-run nga ginapatigayon para sa one-way lane, one-side parking, kag truck ban may kaangtanan sa ginaduso nga Resolution No. 009-2026.
Sa interview sang Bombo Radyo kay Punong Barangay Dax Noel Alovera, iya ginpahayag nga indi malikawan nga may yara sang mga motorista nga nagakakibot kag dismayado bangud may mga naga-park nga salakyan sa mga indi insakto nga lugar.
Suno kay Alovera, malimpyo na ang dalanon, wala sang obstruction kag matawhay na kun ipaanggid sang nagligad nga mga inadlaw nga makitid.
Ginapasalamatan man sang punong barangay ang Traffic Management Unit nga nagabulig sa pagdeleher sang trapiko.
Nagalaum ang natungdan nga mapabilin nga matawhay ang dalagan sang trapiko samtang ginapatuman ang dry run kag mangin dalayon ini tubtob nga mapasar kag mangin ordinansa.
