Pormal na nga ginkakas sang House prosecution panel ang bribery charge batuk kay Vice President Sara Duterte agud mapadasig ang impeachment trial.
Ini ang ginkumpirma ni House prosecutor kag Manila Rep. Joel Chua.
Sa interview sang Bombo Radyo kay Chua, iya ginpahayag nga nadesisyunan na nila ini sang nagligad nga semana matapos ginkakas man bilang witness si former Senator Antonio Trillanes.
Ginpahayag ni Chua nga nagapati ang prosekusyon nga bastante na ang mga ebidensiya nga ginpresentar sa tatlo pa ka impeachment charges gani indi na kinahanglan nga iduso pa ang Article III ukon bribery case.
Suno sa iya, katuyuan sini nga indi makalab-ot sa masunod nga tuig ang trial.
Ginalauman nga magapadayon ang prosekusyon sa pagpresentar sang mga testigo kag mga dokumento may kaangtanan sa Article II, lakip na ang mga bagay may kaangtanan sa ginaalegar wala mapaathag nga manggad ni Duterte.
Ginpanginwala ni Chua nga ang pagbawi sang kaso nga bribery isa ka indikasyon sang kakulang sang ebidensya, kag nagsiling nga mas luyag sang prosekusyon nga matapos ang trial sa sulod sang isa ka tuig.
Dugang pa ni Chua, natalana nga maghatag sang opisyal nga pahayag subong nga adlaw si Lead Prosecutor Rep. Gerville Luistro may kaangtanan sa ila pag drop sang bribery case.
