Ginlunsyar sang DepEd Roxas City Division ang Brigada Eskwela 2026 pinaagi sa isa ka kick-off ceremony nga ginpatigayon sa Lawaan Integrated School bilang kabahin sang preparasyon para sa pagbukas sang klase sa Hunyo 8.
May tema nga “Bayanihan sa Paaralan: Nagkakaisa para sa Kaayusan at Kaalaman,” ang aktibidad nagtuyo nga magpakigbahin ang mga ginikanan, manunudlo, local government kag iban pa nga stakeholders sa pagpreparar sang mga eskwelahan para sa masunod nga school year.
Suno sa DepEd, ang Brigada Eskwela nagalakip sang paglimpyo sang mga classroom, pag-ayo sang mga kagamitan kag pagpasiguro nga matinlo, luwas kag komportable ang mga pasilidad para sa mga estudyante.
Ginpangunahan ang programa ni DepEd Roxas City OIC Schools Division Superintendent Adonis Mosquera, samtang ginrepresentar ni City Councilor Rey Magallanes ang local government sa nasambit nga aktibidad.
Padayon naman ang pagbinuligay sang mga stakeholders agud masiguro ang maayo ang kahimtangan sang mga eskwelahan antes ang pormal nga pagbukas sang klase sa masunod nga semana.
