Nagaplano ang British International Investment ukon BII sang United Kingdom nga maghatag sang $1.6 billion nga pondo para sa mga proyekto nga nagasuporta sa limpyo nga enerhiya sa Southeast Asia, lakip na ang Pilipinas.
Pagagamiton ang nasambit nga pondo sa Pilipinas, Vietnam, Indonesia, Malaysia kag Thailand agud mapadamo ang paggamit sang renewable energy pareho sang solar kag wind power, nga makabulig sa pagdula sang fossil fuel pakadto sa malimpyo nga enerhiya.
Suno sa BII, katunga sang pondo ang igahatag paagi sa ila programa nga British Climate Partners kag ginalauman naman nga may pareho nga kantidad nga makuha halin sa mga pribado nga investor.
Matandaan nga sang 2022, ginbuksan sang Pilipinas ang renewable energy sector para sa 100% nga foreign ownership sa pila ka proyekto, matapos amyendahan ang implementing rules sa pagpatuman sang Renewable Energy Act of 2008.
