ROXAS CITY – Ginpakigbahin sang Alumnus sang Filamer Christian University athlete kag Bronze medalist sa 4×400 mixed relay sa Open track and field sports event ang iya mga inagihan antes ini nangin kabahin sang Philippine delegation sa 31st Southeast Asian games nga ginhiwat sa Hanoi Vietnam.
Sa pagbisita ni Joyme Sequita sa Bombo Radyo Roxas, bitbit sini ang iya broze medal nga nakuha sa sea games 2022, ginpahayag sini nga nagsugod ang iya karera sa nasambit nga sports sadtong fourth year high school pa lamang ini sa Hacienda Conchita National High School sa San Dionisio, Iloilo kun sa diin isa sa mga nag-motivate sa iya amu ang principal sang ila eskwelahan tubtob nga nakalab-ot ini sa palarong pambansa kag nakakuha sang bulawan nga medalya.
Sumugod sadto, madamo na nga universities sa Manila ang nagtanyag kay Sequita sang scholarships kag agud mangin varsity player, apang mas ginpili sini nga mag-eskwela sa isa ka pribado nga Universidad sa syudad sang Roxas.
Nahibaluan nga madamo naman sang napasakupan nga events si Sequita antes inakalab-ot sa international competitions sa patag sang pagdalagan.
Suno kay Sequita, wala ini nagalaom nga makuha niya ang bronze medal bangud indi man madali ang amu nga sports kag madamo sang kakompetensya gikan sa nagkalain-lain nga pungsod.
Antes ini nagpasakop sa 31st Southeast Asian games sa Hanoi Vietnam si Sequita ang nagpadulong pa sa pungsod Singapore kag nagpakigbahin sa 82nd Singapore Open Track and Field Championship 2022 kun sa diin nangin gold medalist man ini.
Aminado man si Sequita nga nakaagom siya sang injury samtang ini ang nagatraining apang ini ang amat-amat man nga nakarekober. Natalana naman nga magabaton sang incentives rewards nga nagalab-ot sa P60,000 nagikan sa Philippine Sports Commission (PSC) si Sequita.
Tuman naman ang pagpasalamat sini sa iya mga professor sa nasambit nga unibersidad nga wala naga-untat sa pagsuporta sa iya kag sa bug-os nga Capiznon. Magapreparar naman si Sequita sa iya event nga pasakupan sa pungsod China sa masunod nga mga binulan.
Disiplina sa kaugalingon, time management, pagkapursigido kag pagsalig sa Ginoo ang nangin yabi ni Sequita agud malab-ot niya ang iya kadalag-an.
