ROXAS CITY – Sigurado nga makabaton sang cash incentives nga nagikan sa Philippine Sports Commission (PSC) kag Malakanyang ang mga nakakuha sang medalya sa 31st Southeast Asian (SEA) Game nga ginhiwat sa Hanoi, Vietnam.
Ini ang ginkumpirmar ni Bronze Medalist Joyme Sequita, residente sang San Dionisio, Iloilo sang mainterview sang Bombo Radyo.
Suno diri, dako nga kadunganan nga marepresentar ang pungsod Pilipinas kun sa din indi nangin madali ang na-agyan nga training sini sa sulod sang 7 ka bulan bilang preparasyon sa SEA Games.
Sa una nga hampang ni Sequita, nakuha sang iya hubon ang ikatatlo nga pwesto sa 4x400m mixed relay nga ginakalakipan nanday Edgardo Alejan, Bernalyn Bejoy kag Gisselle Lumapas kag magabaton sang tig-P15,000 nagikan sa PSC.
Maluwas sa PSC, magatan-ay man ang Malakanyang sang incentives sa mga nakakuha sang medalya nga mga Atletang Pinoy.
Samtang, ginkasubo man sini nga wala ini nakapasakup sa individual race kahapon nga adlaw bangud sa pila ka mga rason kag conflict.
Tuman ang pagpasalamat ni Sequita ilabi na sa nangin mentor kag coach sini sa Filamer Christian University (FCU) nga si Melinda Lopez bangud suno diri, indi sini malab-ot ang kadalag-an kun indi tungod sa iya nga pag-ubay sang naga-eskwela palang ini kag naga-ensayo.
Nagpalab-ot man ini sang mensahe sa mga naga-aspirar nga malakip sa Philippine Team nga magsalig lang sa kaugalingon kag Makaako bangud indi kita sini pagpabay-an kag paslawon.
Mahibaluan nga liwat nga magahampang si Sequita sa 4x400m men’s relay sa Mayo 18, kag luyag na gid sini mabulsa ang bulawan nga medalya.
Nagalaum ang bug-os nga team sang Pilipinas nga madugangan pa ang mapauli nga medalya sa pungsod.
