ROXAS CITY – Nagapati si Engr. Jyka Ella Estanislao passer sang Agricultural Biosystems Engineers Licensure Exam 2023, nga kung may handum ang isa ka indbidwal apisar anu pa ka budlay ang paga-atubangon sini mapangitaan sa gihapon ini sang pamaagi agud malab-ot.
Ini ang hugot kag nagahilibion nga ginpahayag ni Estanislao sang mainterview sang Bombo Radyo.
Mahibaluan ini na ang ika-duha ka beses nga pagkuha sang exam ni Estanislao kung sa diin napaslawan siya sa una nga tion sadtong 2021.
Apisar nakabatyag sang kasubo kag pagkadismaya, wala siya nagpadala diri sa baylo gindoble pa sini niya ang iya oras sa pagtuon samtang nagatrabaho bilang isa ka call center agent.
Suno diri, indi ini nga kurso ang iya una nga naluyagan apang bangud sa kakulang sa pinansyal nagdesidar na lamang siya nga magkuha sang BSABE kung sa diin libre ang tuition sini.
Ginpakigbahin man sang nasambit nga passer nga indi mahupos ang amu nga kurso kag madamo na nga beses nagsulod sa iya pinsar nga maghalin sang kurso, apang bangud sa iya pamilya ginpabakod pa niya ang iya buot nga tapuson na lamang ini.
Sa karun nga isa na ini ka enhenyero, luyag ni Estanislao nga mabuligan ang mga mangunguma ilabi na nga mga mangunguma man ang iya ginikanan.
Siya man suno diri ang labing una nga naggradwar sa ila pamilya rason nga dako na lamang ang iya pagpasalamat sa ginuo sang mapasar sini ang board exam.
Mensahe sini sa tanan nga mga estudyante, tun-an nga disiplinahon ang kaugalingon, magpangayo sang bulig sa mahal nga makaako, kag seryusuhon ang pagtuon agud makabalos sang bulig sa pamilya kag sa tanan nga tawo nga yara sa palibot sa tion sang mga pagtilaw nga na-eksperyensyahan.
