Ginpanindugan sang Commission on Elections-Region VI nga padayon ang ila preparasyon para sa Barangay kag Sangguniang Kabataan Elections ukon BSKE 2026.
Sa interview sang Bombo Radyo kay Atty. Will Arceño, Assistant Regional Director sang COMELEC-Region VI, iya ginpahayag nga madayon ang eleksyon bangod wala pa sang ginpagwa nga resolution ukon layi nga nagamando sang postponement sini.
Suno kay Arceño, ginapadayon sang COMELEC ang ila mga preparasyon para sa BSKE samtang wala pa sang opisyal nga desisyon nahanungod sa posible nga pagpa-iway sang eleksyon.
Ginsiguro man sini nga ginahimo sang COMELEC ang tanan nga kinahanglanon agud mapadayon ang BSKE, bangod kun ipaiway ini, posible nga magresulta ini sa dugang nga gasto sa gobyerno.
Nagpanawagan man si Arceño sa publiko nga indi basta magpati sa mga impormasyon nga nagalapta online, ilabi na sa mga wala sang kumpirmasyon halin sa COMELEC.
