ROXAS CITY – Ginpadala na sa central office sang Bangko Sentral ng Pilipinas (BSP) ang P1, 000 peso bill nga ginapatihan counterfeit ukon ‘peke’ nga ginbayad sang isa ka bumalakal sa isa ka relipan sa Teodoro Arcenas Trade Center (TATC).
Ini ang ginpahayag ni Kristina Del Rosario, Administrative Officer – III sang BSP-Capiz sang mainterview sang Bombo Radyo.
Suno kay Del Rosario, indi pa nila makompirmar nga peke gidman ang nasambit nga kwarta bangud ang kinahanglan nga ang central office ang magpadala sang sulat sa ila nga nagakompirmar nga counterfeit ukon ‘peke’ gidman ang amo nga bill.
Angut diri, nagpaandam ang ahensiya sa publiko nga tsekyaron sang husto ang mabaton nila nga kwarta ilabi na sini nga holiday season.
Suno kay Del Rosario nga nagakadapat lamang nga matsekyar sang husto ang mga banknotes agud masiguro nga genuine kag indi sang peke ang pagagamiton nga kwarta sa pagpamakal mangin ang ila nga ginapanghatag.
Mahibaluan nga isa sa epektibo nga pamaagi sang ahensiya sa pagtsekyar sang kwarta amo ang “Feel-Look-Tilt” method.
Kinahanglan man suno diri nga nakahibalo ang publiko sa pag-tsekyar sang mga security features sang isa ka kwarta kalakip diri ang serial number, window thread, embossed letters kag nos.
