Nakuha sang Bangko Sentral ng Pilipinas (BSP) ang “Best Recirculation/ Distribution Initiative or Innovation” award nagikan sa International Association of Currency Affairs (IACA) para sa paglunsyar sang Coin Deposit Machines (CoDMs) sa bug-os nga Metro Manila.
Ginbaton ni BSP Assistant Governor Rosabel Guerrero ang tropeo sa ngalan sang central bank sa seremonya para sa IACA’s “2024 Excellence in Currency Awards for Coin” nga ginhiwat sa Lisbon, Portugal.
Suno sa international body, ang tinutuyo sang Coin Deposit Machines project nga ganyaton ang mga Pilipino nga gamiton ang mga sensilyo nga natipon kabaylo sang e-wallet credits kag shopping vouchers ang nagapakita sang “forward-thinking approach” sang BSP padulong sa mas epektibo kag napabilin ang pag-libot sang barya sa Pilipinas.
Sumugod sang ginlunsyar sadtong 2023, nakalikom na ang CoDMs sang masubra sa P1 billion ang balor sang mga barya.
