ROXAS CITY – Nagpaandam ang Bangko Sentral ng Pilipinas (BSP)-Capiz sa publiko nga may yara sang kapresuhan ang sin-o man madakpan nga ginahigkuan ang kwarta.
Ini ang ginpaghayag ni Kristina Del Rosario, Administrative Services Officer-III sang BSP-Capiz sang ma-interview sang Bombo Radyo.
Suno kay Del Rosario nga dapat likawan sang publiko nga higkuan, lukuton, sulatan, butangan sang buho kag sug-an ang kwarta agud matuman ang adbokasiya sang BSP nga Clean Note Policy.
Gindugang pa sini nga kun tuman na kahigku kag tuman na kalukot ang kwarta mabudlay na ini madetermine kun peke ukon indi ang amo nga kwarta.
Aminado si Del Rosario nga tubtob sa karun, may mga nabaton sila nga mga kwarta nga tuman kahigko.
Magluwas diri, may yara naman sang nagakaigo nga multa ang sin-o man mapamatud-an nga nagahigku sang kwarta.
Mahibaluan nga sandig sa Presidential Decree 247 may yara sang nagakaigo nga multa nga nagalabot sa P20,000 kag kapresuhan nga duha tubtub lima ka-tuig ang sin-o man mapamatud-an nga ginahigkuan ang kwarta sang Pilipinas.
