ROXAS CITY – Nahangawa sa karon ang Bangko Sentral ng Pilipinas sa paglapta sang mga peke nga kwarta sa probinsiya sang Capiz.
Bangud diri nagpaandam ang ahensiya sa publiko nga tsekyaron sang husto ang mabaton nila nga kwarta ilabi na sini nga holiday season.
Sa interview sang Bombo Radyo kay Kristina del Rosario, Administrative Services Officer III sang BSP-Capiz, ginpahayag sini nga nagakadapat lamang nga matsekyar sang husto ang mga banknotes agud masiguro nga genuine kag indi sang peke ang pagagamiton nga kwarta sa pagpamakal mangin ang ila nga ginapanghatag.
Mahibaluan nga isa sa epektibo nga pamaagi sang ahensiya sa pagtsekyar sang kwarta amo ang “Feel-Look-Tilt” method.
Mahibaluan nga ginkahangaw-an sang ahensiya ang paglapta sang mga peke nga kwarta sa probinsiya kun sa diin isa ka concerned citizen ang nagdangop sa Bombo Radyo agud ipakita nga nakabaton ini sang 1000 peso bill.
Kasunod sini isa man ka negosyante sa Teodoro Arcenas Trade Center ang nabiktima sang duha ka mga babaye nga nagbayad sang 1000 kag 500 peso bill nga lunsay fake.
Bangud diri padayon ang pagpahanumdom sang BSP sa publiko nga mangin maaligmat kag tsekyaron sang husto ang ila ginabaton nga kwarta.
