Hugot nga ginpanginwala sang BigHit Music ang mga report nga kalakip ang BTS sa ginapahayag isa ka tribute album para sa nagtaliwan nga pop icon nga si Michael Jackson.
Nag-ugat ang amo nga report nagikan sa The Irish Sun, kun sa diin ginsiling ni Paddy Dunning, tag-iya sang Grouse Lodge studio sa Ireland, nga ginaalegar nag-record ang BTS sang kanta para sa nasambit nga proyekto.
Apang suno sa pahayag sang BigHit Music, wala nagbisita ang BTS sa Grouse Lodge Studio sa Ireland ukon nagpasakop sa ano man ngg recording session para sa nasambit nga proyekto.
Dugang pa sang label company, magapatigayon sila sang nagakadapat nga tikang agud tapnaon ang paglapta sang sala nga impormasyon angut sa grupo.
Wala pa sa karon naghatag sang sabat si Dunning ukon ang The Irish Sun sa nangin pahayag sang BigHit.
Samtang, natapos na ang mandatory military service sang BTS members nga sanday RM, Jin, Suga, J-Hope, Jimin, V, kag Jungkook. Sang Hulyo, ginpaguha nila ang Permission to Dance live album, kag kumpirmado nga may manug-abot nga bag-o nga album kag world tour sa 2026.
