Naglab-ot ang budget surplus sang Pilipinas sa P165.4 bilyon sa una nga bulan sang 2026.
Nahimo ini sang national government bangud sa pagtaas sang kita sang gobyerno.
Halos triple ini sa budget surplus nga na-record sang Enero sang nagligad nga tuig nga naglab-ot lang sa P68.4 billion.
Sa sina nga bulan, nakatipon ang national government sang P468.9 bilyon nga kabug-usan nga kita.
Daku man nga bahin sang kita ang naghalin sa Bureau of Internal Revenue (BIR) nga nakakolekta sang P358.7 bilyon, mas mataas ini sang 1.01% kumpara sang Enero 2025.
Ang Bureau of Customs (BOC) nakakolekta man sang P80.9 bilyon nga nagtaas sang 2.13%.
Gin-athag sang Bureau of Customs, nga ang mas mataas nga koleksyon sang buwis ang bangud sa mas istrikto nga pagpatuman sang nagkalain-lain nga tikang batuk sa smuggling kag iban pa nga iligal nga aktibidad.
Para sa Bureau of Internal Revenue, ginakilala sini ang digitalization kag mas istrikto nga tax administration bilang nagapanguna nga rason sang pagsaka sang tax collection sa una nga bulan subong nga tuig.
