ROXAS CITY – Nagapadayon ang pagpamakal sang palay sang National Food Authority (NFA) Capiz sa presyo nga P19.00 kada kilo, apang kinahanglan nga uga na ini kag malimpyo.
Sa Interview sang Bombo Radyo kay Ms.Cashmere Gemarino, Branch Manager sang NFA Capiz aminado ini nga may ara sang kabudlay sa ila subong nga pagpamakal sang palay sa mga mangunguma, kag wala pa nila malab-ot ang target nga balaklon apisar nga may ara sang available nga pondo para diri.
Suno kay Gemarino, naintindihan man nila kung wala ginabaligya sa ila sang mga mangunguma ang ila palay kay sa subong mataas ang presyo sang mga pribado nga traders nga nagalab-ot sa P23.00 kada kilo, kag yara na sa gilayon ang manugbakal.
Aminado man sila nga naga-utang ang mga mangunguma sa ila rason nga sa ila man ginahatag ang ila mga patubas.
Nagapadulong man ang NFA sa mga baranggay para indi na mbudlayan ang mga mangunguma sa ila nga pagbaligya, sa pihak nga may mga nabakal man ang NFA nga bastante ang buffers stock sang palay sa tion nga may kalamidad.
Dugang pa ni Gemarino nga nagapakig-angut na sila sa mga Local Government Unit (LGU) agud makadugang sa presyo sang palay kada kilo kag sa ulihi mahimo makabakal sang sinako nga bugas sa NFA, apisar wala sang kalamidad kung kinahanglan sa ila mga programa.
