ROXAS CITY – Magapatigayon sang Two-minute silence ang bug-os nga United Kingdom, pagkatapos sang funeral service, nga magatuon sa eksakto alas-11:55 sa aga subong nga Lunes (oras sa UK).
Ini agud hatagan sang katahuran ang nagtaliwan nga Reyna nga si Her Majesty Queen Elizabeth II.
Sa interview sang Bombo Radyo kay Mr. Roland Crispo, Bombo International Correspondent direkta sa London, U.K., ginpakigbahin sini ang magakahinabo sa adlaw sang pagdul-ong sa katapusan nga palahuwayan sang Reyna.
Suno diri, alas-6:30 subong nga aga (oras sa UK) sarado na ang public viewing sa haya ni Queen Elizabeth II, kun sa diin ang lungon sini ang ‘entirely closed’ rason nga indi makita ang nawong sang Reyna.
Ginpakigbahin man ni Crispo, nga apisar nagakasubo sila sa kamatayon ni Queen Elizabeth II, may gamay man sila nga selebrasyon bangud sa installation ni King Charles III bilang bag-o nga Hari, nga ginapatigayon sa Buckingham palace.
Apang ang sentro sa karon ang didto sa Westminster.
Alas-10:44, igabutang sa gun carriage sang Navy ang lungon sang Reyna, kag pagasundan sang mahaba-haba nga prosesyon nagikan sa Westminster Abbey kag igatunod sa Windsor castle, nga pagaupdan sang Royal family.
Alas-11 sa aga, magaumpisa ang funeral service, kag alas-11:55 patigayunon ang duha ka minuto nga kalinong.
Masunod diri, igabutang liwat sa gun carriage ang lungon ni Queen Elizabeth agud pagadal-on sa Wellington Arch.
Alas-4 sa hapon, patigayunon ang televised committal ceremony kun sa diin sini nga inoras, igatunod na sa Royal vault ang lungon sang Reyna, kag marka sang pagtakop sang pagdul-ong sa katapusan nga palahuwayan sang longest-living Monarch sang Great Britain.
Pagkatapos sini, alas-7:30 sa gab-i, may pagahiwaton nga private interment sa The King George VI Memorial chapel kun sa diin ang lungon sang Reyna ang iga-ingod kay Prince Philip, ang nagtaliwan nga bana ni Queen Elizabeth.
Ginalauman nga magadagsa ang magatambong sa makasaysayan nga hitabo sa Britanya, bangud linibo ang magapakigbahin sini nga kahiwatan kalakip na ang kapin 200 ka mga imbitado nga pungsod sa kalibutan.
Sa karon, kadam-an sang mga tawo sa London ang wala sang tulog bangud sa pagpakita sang ila pagtahod sa nagtaliwan nga Reyna.
