Nangin liyabe sang isa ka Capiznon ang bug-os nga suporta sang iya nga pamilya kag mga abyan agud makapasar sa Pharmacist Licensure Examination.
Sa interview sang Bombo Radyo kay Maybeline Bueno sang Barangay Tiza, Roxas City, iya ginpahayag nga tuman ang kasadya nga iya nga nabatyagan bangud nakapasar ini sa una niya nga pag-take sang exam.
Suno kay Bueno, handom sini ang mangin isa ka pharmacist bangud gusto sini nga makabulig sa mga nagakinahanglan sang bulig medikal.
Pahayag pa niya, apisar mabudlay ang review, nagamag-an bangud kaupod sini ang iya mga abyan nga kaangay niya magakuha man sang exam.
Dugang pa niya, tuman man ang pagpasalamat sini sa iya nga pamilya nga gin-updan kag ginbuligan siya sa iya nga journey.
Nagpahanumdom man ang natungdan sa mga aspiring pharmacist nga mangin mapisan sa pagtuon, i-embrace ang tanan nga learning kag magbulig sa mga nagakinahanglan sa tanan nga tion.
